Θυμίαμα ἀρώματα
Λευκοθέην καλέω Καδμηΐδα, δαίμονα σεμνήν,
εὐδύνατον, θρέπτειραν ἐϋστεφάνου Διονύσου.
κλῦθι, θεά, πόντοιο βαθυστέρνοιο μέδουσα,
κύμασι τερπομένη, θνητῶν σώτειρα μεγίστη.
ἐν σοί γάρ νηῶν πελαγοδρόμος ἄστατος ὁρμή,
μούνη δέ θνητῶν οἰκτρόν μόρον εἰν ἁλί λύεις,
οἷς ἄν ἐφορμαίνουσα φίλη σωτήριος ἔλθης.
ἀλλά θεά δέσποινα, μόλοις ἐπαρωγός ἐοῦσα
νηυσίν ἐπ’ εὐσέλμοις σωτήριος εὔφρονι βουλῇ,
μύσταις ἐν πόντω ναυσίδρομον οὖρον ἄγουσα.